8ਵੀਂ ਜਮਾਤ ਦੇ 13 ਸਾਲਾ ਆਰਵ ਦੀ ਦੂਜੀ ਕਿਤਾਬ ਪ੍ਰਕਾਸ਼ਿਤ, ‘ਸਵਿਚ ਵਰਡ’ ’ਚ ਟੀਨਏਜ ਦੀਆਂ ਸਮੱਸਿਆਵਾਂ ਤੇ ਹੱਲ

8ਵੀਂ ਜਮਾਤ ਦੇ 13 ਸਾਲਾ ਆਰਵ ਦੀ ਦੂਜੀ ਕਿਤਾਬ ਪ੍ਰਕਾਸ਼ਿਤ, ‘ਸਵਿਚ ਵਰਡ’ ’ਚ ਟੀਨਏਜ ਦੀਆਂ ਸਮੱਸਿਆਵਾਂ ਤੇ ਹੱਲ
ਰਿਪੋਰਟਰ: ਲਵਪ੍ਰੀਤ ਸਿੰਘ ਖੁਸ਼ੀਪੁਰ, ਗੁਰਦਾਸਪੁਰ

ਗੁਰਦਾਸਪੁਰ: ਗੁਰਦਾਸਪੁਰ ਦੇ ਰਹਿਣ ਵਾਲੇ 8ਵੀਂ ਜਮਾਤ ਦੇ 13 ਸਾਲਾ ਵਿਦਿਆਰਥੀ ਆਰਵ ਸਾਈਂ ਗੁਪਤਾ ਨੇ ਆਪਣੀ ਦੂਜੀ ਕਿਤਾਬ ਲਿਖ ਕੇ ਵੱਡੀ ਉਪਲਬਧੀ ਹਾਸਲ ਕੀਤੀ ਹੈ। ਆਰਵ ਦੀ ਇਹ ਕਿਤਾਬ ਹੁਣ ਪ੍ਰਕਾਸ਼ਿਤ ਹੋ ਕੇ ਮਾਰਕੀਟ ਵਿੱਚ ਵੀ ਆ ਚੁੱਕੀ ਹੈ।
ਆਰਵ ਦੀ ਪਹਿਲੀ ਕਿਤਾਬ ਜਨਵਰੀ 2026 ਵਿੱਚ ਪ੍ਰਕਾਸ਼ਿਤ ਹੋਈ ਸੀ। ਇਸ ਕਿਤਾਬ ਵਿੱਚ ਉਸ ਨੇ ਭਗਵਾਨ ਸ੍ਰੀ ਕ੍ਰਿਸ਼ਨ ਦੇ ਜੀਵਨ ਨਾਲ ਜੁੜੇ ਅਜਿਹੇ ਕਿੱਸਿਆਂ ਨੂੰ ਪੇਸ਼ ਕੀਤਾ ਸੀ, ਜਿਨ੍ਹਾਂ ਬਾਰੇ ਬਹੁਤ ਘੱਟ ਲੋਕ ਜਾਣਦੇ ਸਨ। ਪਹਿਲੀ ਕਿਤਾਬ ਨੂੰ ਪਾਠਕਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲਿਆ ਸੀ।
ਹੁਣ ਆਰਵ ਨੇ ਆਪਣੀ ਦੂਜੀ ਕਿਤਾਬ ‘ਸਵਿਚ ਵਰਡ’ ਵਿੱਚ ਟੀਨਏਜ ਨਾਲ ਜੁੜੀਆਂ ਵੱਖ-ਵੱਖ ਸਮੱਸਿਆਵਾਂ ਨੂੰ ਉਜਾਗਰ ਕੀਤਾ ਹੈ। ਇਸ ਦੇ ਨਾਲ ਹੀ ਕਿਤਾਬ ਵਿੱਚ ਇਨ੍ਹਾਂ ਸਮੱਸਿਆਵਾਂ ਨਾਲ ਨਜਿੱਠਣ ਲਈ ਸੰਭਾਵਿਤ ਹੱਲ ਵੀ ਦੱਸੇ ਗਏ ਹਨ।

ਆਰਵ ਮੁਤਾਬਕ ਟੀਨਏਜ ਦਾ ਹਿੱਸਾ ਹੋਣ ਕਾਰਨ ਉਸ ਨੇ ਆਪਣੇ ਦੋਸਤਾਂ ਵਿੱਚ ਓਵਰਥਿੰਕਿੰਗ, ਨਾਕਾਮਯਾਬੀ ਦਾ ਡਰ ਅਤੇ ਹੋਰ ਕਈ ਸਮੱਸਿਆਵਾਂ ਨੂੰ ਨੇੜਿਓਂ ਦੇਖਿਆ। ਇਨ੍ਹਾਂ ਸਮੱਸਿਆਵਾਂ ਨੂੰ ਸਮਝਣ ਲਈ ਉਸ ਨੇ ਜਾਣਕਾਰੀ ਇਕੱਠੀ ਕੀਤੀ ਅਤੇ ਉਨ੍ਹਾਂ ਬਾਰੇ ਗਹਿਰਾਈ ਨਾਲ ਵਿਚਾਰ ਕੀਤਾ। ਇਸੇ ਤਜਰਬੇ ਅਤੇ ਜਾਣਕਾਰੀ ਨੂੰ ਉਸ ਨੇ ਆਪਣੀ ਕਿਤਾਬ ਵਿੱਚ ਸ਼ਾਮਲ ਕੀਤਾ ਹੈ।ਆਰਵ ਨੇ ਦੱਸਿਆ ਕਿ ਕਿਤਾਬ ਦਾ ਹਰ ਚੈਪਟਰ ਇੱਕ ਨਵੀਂ ਸਮੱਸਿਆ ਨਾਲ ਜਾਣੂ ਕਰਵਾਉਂਦਾ ਹੈ ਅਤੇ ਨਾਲ ਹੀ ਉਸ ਨਾਲ ਨਜਿੱਠਣ ਲਈ ਸੰਭਾਵਿਤ ਹੱਲ ਵੀ ਪੇਸ਼ ਕਰਦਾ ਹੈ। ਉਸ ਦਾ ਮੰਨਣਾ ਹੈ ਕਿ ਇਹ ਕਿਤਾਬ ਟੀਨਏਜ ਦੇ ਨੌਜਵਾਨਾਂ ਨੂੰ ਆਪਣੀਆਂ ਸਮੱਸਿਆਵਾਂ ਨੂੰ ਸਮਝਣ ਅਤੇ ਉਨ੍ਹਾਂ ਨਾਲ ਹਿੰਮਤ ਨਾਲ ਨਜਿੱਠਣ ਲਈ ਪ੍ਰੇਰਿਤ ਕਰੇਗੀ।
ਉੱਥੇ ਹੀ ਆਰਵ ਦੀ ਮਾਤਾ ਮੀਨੂ ਗੁਪਤਾ ਨੇ ਦੱਸਿਆ ਕਿ ਆਰਵ ਨੇ ਇਸ ਕਿਤਾਬ ਲਈ ਕਾਫ਼ੀ ਮਿਹਨਤ ਕੀਤੀ ਹੈ। ਉਹ ਦੇਰ ਰਾਤ ਤੱਕ ਜਾਗ ਕੇ ਨੋਟਸ ਤਿਆਰ ਕਰਦਾ ਅਤੇ ਕਿਤਾਬ ਲਈ ਸਮੱਗਰੀ ਇਕੱਠੀ ਕਰਦਾ ਸੀ। ਹੁਣ ਕਿਤਾਬ ਦੇ ਪ੍ਰਕਾਸ਼ਿਤ ਹੋ ਕੇ ਮਾਰਕੀਟ ਵਿੱਚ ਆਉਣ ’ਤੇ ਪਰਿਵਾਰ ਵਿੱਚ ਖੁਸ਼ੀ ਦਾ ਮਾਹੌਲ ਹੈ।
13 ਸਾਲ ਦੀ ਉਮਰ ਵਿੱਚ ਦੂਜੀ ਕਿਤਾਬ ਲਿਖ ਕੇ ਆਰਵ ਨੇ ਨਾ ਸਿਰਫ਼ ਆਪਣੀ ਪ੍ਰਤਿਭਾ ਦਾ ਪ੍ਰਦਰਸ਼ਨ ਕੀਤਾ ਹੈ, ਸਗੋਂ ਟੀਨਏਜ ਦੇ ਨੌਜਵਾਨਾਂ ਨਾਲ ਜੁੜੇ ਅਹਿਮ ਮੁੱਦਿਆਂ ਨੂੰ ਵੀ ਆਪਣੀ ਲਿਖਤ ਰਾਹੀਂ ਸਾਹਮਣੇ ਲਿਆਉਣ ਦੀ ਕੋਸ਼ਿਸ਼ ਕੀਤੀ ਹੈ।