ਕਬਾੜ ਦਾ ਕੰਮ ਕਰਨ ਵਾਲੀ ਬੀਬੀ ਛੰਨੋ ਬਣੀ MC, ਲੌਂਗੋਵਾਲ ਵਾਰਡ ਨੰ. 12 ਤੋਂ ਸ਼ਾਨਦਾਰ ਜਿੱਤ

ਸੰਗਰੂਰ/ਲੌਂਗੋਵਾਲ: ਲੌਂਗੋਵਾਲ ਵਿੱਚ ਹੋਈ ਸਥਾਨਕ ਚੋਣ ਵਿੱਚ ਇੱਕ ਵਿਲੱਖਣ ਅਤੇ ਪ੍ਰੇਰਣਾਦਾਇਕ ਨਤੀਜਾ ਸਾਹਮਣੇ ਆਇਆ ਹੈ, ਜਿੱਥੇ ਕਬਾੜ ਦਾ ਕੰਮ ਕਰਨ ਵਾਲੇ ਪਰਿਵਾਰ ਨਾਲ ਸਬੰਧਤ ਬੀਬੀ ਛੰਨੋ ਨੇ ਵਾਰਡ ਨੰਬਰ 12 ਤੋਂ ਮਿਊਂਸਪਲ ਕੌਂਸਲਰ (ਐਮ.ਸੀ.) ਵਜੋਂ ਸ਼ਾਨਦਾਰ ਜਿੱਤ ਹਾਸਲ ਕੀਤੀ ਹੈ। ਇਸ ਚੋਣ ਨੂੰ ਇਲਾਕੇ ਵਿੱਚ ਲੋਕਤੰਤਰ ਦੀ ਅਸਲ ਤਾਕਤ ਅਤੇ ਆਮ ਨਾਗਰਿਕ ਦੀ ਜਿੱਤ ਵਜੋਂ ਦੇਖਿਆ ਜਾ ਰਿਹਾ ਹੈ। ਬੀਬੀ ਛੰਨੋ ਦੀ ਜਿੱਤ ਵਿੱਚ ਉਨ੍ਹਾਂ ਦੀ ਸਾਦਗੀ, ਲੰਬੇ ਸਮੇਂ ਤੋਂ ਇਲਾਕੇ ਵਿੱਚ ਕੀਤੀ ਸੇਵਾ ਅਤੇ ਸਥਾਨਕ ਲੋਕਾਂ ਦਾ ਭਰਪੂਰ ਸਹਿਯੋਗ ਮੁੱਖ ਕਾਰਨ ਰਹੇ। ਜਿੱਤ ਤੋਂ ਬਾਅਦ ਭਾਵੁਕ ਹੋ ਕੇ ਬੀਬੀ ਛੰਨੋ ਨੇ ਕਿਹਾ ਕਿ ਉਨ੍ਹਾਂ ਨੇ ਕਦੇ ਵੀ ਸੋਚਿਆ ਨਹੀਂ ਸੀ ਕਿ ਕਬਾੜ ਦਾ ਕੰਮ ਕਰਨ ਵਾਲੇ ਪਰਿਵਾਰ ਦੀ ਇੱਕ ਆਮ ਔਰਤ ਨੂੰ ਲੋਕ ਇੰਨਾ ਵੱਡਾ ਮਾਣ ਦੇਣਗੇ। ਉਨ੍ਹਾਂ ਨੇ ਕਿਹਾ ਕਿ ਇਹ ਜਿੱਤ ਸਿਰਫ਼ ਉਨ੍ਹਾਂ ਦੀ ਨਹੀਂ, ਸਗੋਂ ਪੂਰੇ ਵਾਰਡ ਦੀ ਜਿੱਤ ਹੈ। ਬੀਬੀ ਛੰਨੋ ਨੇ ਵਾਅਦਾ ਕੀਤਾ ਕਿ ਉਹ ਆਪਣੇ ਵਾਰਡ ਦੀਆਂ ਮੁੱਖ ਸਮੱਸਿਆਵਾਂ, ਖ਼ਾਸ ਕਰਕੇ ਪਾਣੀ ਦੀ ਕਮੀ ਨੂੰ ਦੂਰ ਕਰਨ ਲਈ ਨਵੀਆਂ ਮੋਟਰਾਂ ਲਗਵਾਉਣ ਅਤੇ ਵਿਕਾਸ ਕਾਰਜਾਂ ਨੂੰ ਤੇਜ਼ੀ ਨਾਲ ਅੱਗੇ ਵਧਾਉਣਗੀਆਂ।ਸਥਾਨਕ ਜਾਣਕਾਰੀ ਮੁਤਾਬਕ, ਇਹ ਵਾਰਡ ਪਹਿਲਾਂ ਬੀ.ਸੀ. ਸ਼੍ਰੇਣੀ ਵਿੱਚ ਸੀ, ਜਿੱਥੇ ਪਿਛਲੀ ਵਾਰ ਸਾਬਕਾ ਐਮ.ਸੀ. ਗੁਰਮੀਤ ਸਿੰਘ ਵੱਡੀ ਲੀਡ ਨਾਲ ਜਿੱਤੇ ਸਨ। ਪਰ ਇਸ ਵਾਰ ਵਾਰਡ ਦੇ ਐਸ.ਸੀ. ਸ਼੍ਰੇਣੀ ਵਿੱਚ ਆਉਣ ਤੋਂ ਬਾਅਦ ਸਥਾਨਕ ਭਾਈਚਾਰੇ ਨੇ ਆਪਸੀ ਸਹਿਮਤੀ ਨਾਲ ਬੀਬੀ ਛੰਨੋ ਨੂੰ ਉਮੀਦਵਾਰ ਬਣਾਇਆ।

ਲੋਕਾਂ ਦਾ ਕਹਿਣਾ ਹੈ ਕਿ ਲਗਭਗ 20 ਸਾਲਾਂ ਤੋਂ ਇਲਾਕੇ ਵਿੱਚ ਸਰਗਰਮ ਰਹੇ ਇਸ ਪਰਿਵਾਰ ਦੀ ਇਮਾਨਦਾਰੀ ਅਤੇ ਲੋਕਾਂ ਨਾਲ ਜੁੜਾਅ ਕਾਰਨ ਉਨ੍ਹਾਂ ਨੂੰ ਵਿਆਪਕ ਸਮਰਥਨ ਮਿਲਿਆ। ਲੌਂਗੋਵਾਲ ਦੀ ਇਹ ਚੋਣ ਨਤੀਜਾ ਦਰਸਾਉਂਦਾ ਹੈ ਕਿ ਜੇਕਰ ਇਰਾਦੇ ਸਾਫ਼ ਹੋਣ ਅਤੇ ਲੋਕਾਂ ਨਾਲ ਜੁੜਾਅ ਮਜ਼ਬੂਤ ਹੋਵੇ ਤਾਂ ਇੱਕ ਆਮ ਵਿਅਕਤੀ ਵੀ ਸਿਆਸਤ ਵਿੱਚ ਵੱਡੀ ਜ਼ਿੰਮੇਵਾਰੀ ਤੱਕ ਪਹੁੰਚ ਸਕਦਾ ਹੈ।ਹੁਣ ਸਭ ਦੀਆਂ ਨਜ਼ਰਾਂ ਇਸ ਗੱਲ ’ਤੇ ਹਨ ਕਿ ਨਵੀਂ ਚੁਣੀ ਗਈ ਐਮ.ਸੀ. ਬੀਬੀ ਛੰਨੋ ਆਪਣੇ ਵਾਰਡ ਦੇ ਵਿਕਾਸ ਕਾਰਜਾਂ ਨੂੰ ਕਿਹੜੀ ਰਫ਼ਤਾਰ ਅਤੇ ਦਿਸ਼ਾ ਦਿੰਦੀ ਹੈ।