ਫਰਾਂਸ ਦੇ ਰਾਸ਼ਟਰਪਤੀ ਮੈਕਰੋਂ ਪੰਜਾਬੀ ਗੀਤ ਦੇ ਫੈਨ ਬਣੇ, PM ਮੋਦੀ ਨਾਲ “ਆਰੀ ਆਰੀ” ਰੀਲ ਨੇ ਮਚਾਈ ਧਮਾਲ

ਨਵੀਂ ਦਿੱਲੀ/ਫਰਾਂਸ: ਭਾਰਤ ਅਤੇ ਫਰਾਂਸ ਦੀ ਦੋਸਤੀ ਨੇ ਸੋਸ਼ਲ ਮੀਡੀਆ ‘ਤੇ ਇੱਕ ਨਵਾਂ ਅਤੇ ਰੰਗੀਨ ਰੂਪ ਧਾਰ ਲਿਆ ਹੈ। ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਂ ਵੱਲੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਆਪਣੀ ਨਿਸ (Nice) ਫੇਰੀ ਦੀ ਇੱਕ ਵਿਸ਼ੇਸ਼ ਵੀਡੀਓ ਰੀਲ ਸਾਂਝੀ ਕੀਤੀ ਗਈ ਹੈ, ਜਿਸ ਵਿੱਚ ਬਾਲੀਵੁੱਡ ਫਿਲਮ ਧੁਰੰਧਰ ਦਾ ਸੁਪਰਹਿੱਟ ਪੰਜਾਬੀ ਗੀਤ “ਆਰੀ ਆਰੀ” ਬੈਕਗ੍ਰਾਊਂਡ ਵਿੱਚ ਚੱਲ ਰਿਹਾ ਹੈ। ਇਹ ਵੀਡੀਓ ਦੋਵਾਂ ਵਿਸ਼ਵ ਨੇਤਾਵਾਂ ਦੀ ਮੁਲਾਕਾਤ, ਗੱਲਬਾਤ ਅਤੇ “ਇੰਡੀਆ ਇਨੋਵੇਟਸ 2026” ਕਾਨਫਰੰਸ ਦੇ ਮੁੱਖ ਪਲਾਂ ਨੂੰ ਸਿਨੇਮੈਟਿਕ ਢੰਗ ਨਾਲ ਪੇਸ਼ ਕਰਦੀ ਹੈ।

https://www.instagram.com/p/DZkhBYotu75/?utm_source=ig_embed&utm_campaign=embed_video_watch_again

ਰਾਸ਼ਟਰਪਤੀ ਮੈਕਰੋਂ ਨੇ ਇਹ ਵੀਡੀਓ ਫੇਸਬੁੱਕ, X (ਟਵਿੱਟਰ) ਅਤੇ ਇੰਸਟਾਗ੍ਰਾਮ ਸਮੇਤ ਵੱਖ-ਵੱਖ ਪਲੇਟਫਾਰਮਾਂ ‘ਤੇ ਪੋਸਟ ਕੀਤੀ। ਵੀਡੀਓ ਦੀ ਸ਼ੁਰੂਆਤ ਦੋਵਾਂ ਨੇਤਾਵਾਂ ਦੇ ਗਰਮਜੋਸ਼ੀ ਭਰੇ ਹੱਥ ਮਿਲਾਉਣ ਅਤੇ ਗਲੇ ਮਿਲਣ ਨਾਲ ਹੁੰਦੀ ਹੈ। ਇਸ ਤੋਂ ਬਾਅਦ ਵੀਡੀਓ ਵਿੱਚ ਭਾਰਤ-ਫਰਾਂਸ ਸਬੰਧਾਂ, ਤਕਨਾਲੋਜੀ, ਨਵੀਨਤਾ ਅਤੇ ਭਵਿੱਖੀ ਸਹਿਯੋਗ ਨਾਲ ਜੁੜੇ ਮਹੱਤਵਪੂਰਨ ਪਲ ਦਰਸਾਏ ਗਏ ਹਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਫਰਾਂਸ ਦੇ ਦੌਰੇ ‘ਤੇ “ਇੰਡੀਆ ਇਨੋਵੇਟਸ 2026” ਅਤੇ “ਗਲੋਬਲ ਏਆਈ ਸਮਿਟ” ਵਿੱਚ ਸ਼ਾਮਲ ਹੋਣ ਲਈ ਗਏ ਸਨ। ਇਸ ਦੌਰੇ ਦੇ ਅੰਤ ‘ਤੇ ਰਾਸ਼ਟਰਪਤੀ ਮੈਕਰੋਂ ਵੱਲੋਂ ਇਹ ਵੀਡੀਓ ਇੱਕ “ਸਿਨੇਮੈਟਿਕ ਧੰਨਵਾਦ” ਵਜੋਂ ਸਾਂਝੀ ਕੀਤੀ ਗਈ। ਵੀਡੀਓ ਦੇ ਵਾਇਰਲ ਹੋਣ ਤੋਂ ਬਾਅਦ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵੀ ਰਾਸ਼ਟਰਪਤੀ ਮੈਕਰੋਂ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਭਾਰਤ ਅਤੇ ਫਰਾਂਸ ਦੀ ਭਾਈਵਾਲੀ ਭਵਿੱਖ ਵਿੱਚ ਤਕਨਾਲੋਜੀ, ਨਵੀਨਤਾ ਅਤੇ ਨਵੇਂ ਉਦਯੋਗਾਂ ਵਿੱਚ ਹੋਰ ਮਜ਼ਬੂਤ ਹੋਵੇਗੀ।

ਸੋਸ਼ਲ ਮੀਡੀਆ ‘ਤੇ ਛਾਇਆ ਪੰਜਾਬੀ ਗੀਤ “ਆਰੀ ਆਰੀ”

ਇਹ ਵੀਡੀਓ ਕੁਝ ਹੀ ਘੰਟਿਆਂ ਵਿੱਚ ਲੱਖਾਂ ਵਾਰ ਦੇਖੀ ਗਈ ਅਤੇ ਤੇਜ਼ੀ ਨਾਲ ਵਾਇਰਲ ਹੋ ਗਈ। ਯੂਜ਼ਰਜ਼ ਨੇ ਮਜ਼ਾਕੀਆ ਅਤੇ ਸਕਾਰਾਤਮਕ ਟਿੱਪਣੀਆਂ ਕਰਦਿਆਂ ਲਿਖਿਆ ਕਿ “ਫਰਾਂਸ ਵਿੱਚ ਵੀ ਪੰਜਾਬੀ ਗੀਤ ਚੱਲ ਰਹੇ ਹਨ” ਅਤੇ “ਮੈਕਰੋਂ ਵੀ ਪੰਜਾਬੀ ਮਿਊਜ਼ਿਕ ਦੇ ਫੈਨ ਬਣ ਗਏ ਹਨ”। ਦੋਵਾਂ ਨੇਤਾਵਾਂ ਦੀ ਇਹ ਮਹੱਤਵਪੂਰਨ ਮੁਲਾਕਾਤ ਫਰਾਂਸ ਦੇ ਨਿਸ ਸ਼ਹਿਰ ਵਿੱਚ ਵਿਲਾ ਕੈਰੀਲੋਸ ਵਿੱਚ ਹੋਈ। ਇਹ ਮੁਲਾਕਾਤ ਭਾਰਤ-ਫਰਾਂਸ ਦੀ “ਵਿਸ਼ੇਸ਼ ਗਲੋਬਲ ਰਣਨੀਤਕ ਭਾਈਵਾਲੀ” ਮਜ਼ਬੂਤ ਕਰਨ ਵੱਲ ਇੱਕ ਹੋਰ ਕਦਮ ਮੰਨੀ ਜਾ ਰਹੀ ਹੈ।ਇਸ ਦੌਰੇ ਅਤੇ ਸੋਸ਼ਲ ਮੀਡੀਆ ਰੀਲ ਨੇ ਦੋਵਾਂ ਦੇਸ਼ਾਂ ਦੇ ਸਬੰਧਾਂ ਨੂੰ ਇੱਕ ਨਵੀਂ ਡਿਜੀਟਲ ਅਤੇ ਸੱਭਿਆਚਾਰਕ ਪਹਚਾਣ ਦਿੱਤੀ ਹੈ। ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਇਸ ਤਰ੍ਹਾਂ ਦੇ ਕੂਟਨੀਤਿਕ ਅਤੇ ਸੱਭਿਆਚਾਰਕ ਮਿਲਾਪ ਭਵਿੱਖ ਵਿੱਚ ਦੋਵਾਂ ਦੇਸ਼ਾਂ ਦੇ ਰਿਸ਼ਤਿਆਂ ਨੂੰ ਹੋਰ ਮਜ਼ਬੂਤ ਕਰਨਗੇ।