ਸਰਕਾਰੀ ਹਸਪਤਾਲਾਂ ‘ਚ ਜਨਮੇ ਹਰ ਬੱਚੇ ਨੂੰ ਮਿਲੇਗੀ ਸੋਨੇ ਦੀ ਅੰਗੂਠੀ, ਤਾਮਿਲਨਾਡੂ ਸਰਕਾਰ ਦੀ ਨਵੀਂ ਯੋਜਨਾ ‘ਥਾਈਮਾਮਨ ਥੰਗਾ ਮੋਥੀਰਾਮ’ ਸ਼ੁਰੂ

ਚੇਨਈ: ਤਾਮਿਲਨਾਡੂ ਦੀ ਨਵੀਂ ਸਰਕਾਰ ਨੇ ਗਰੀਬ ਅਤੇ ਮੱਧ ਵਰਗ ਪਰਿਵਾਰਾਂ ਲਈ ਇੱਕ ਵਿਲੱਖਣ ਤੇ ਲੋਕ-ਹਿਤੈਸ਼ੀ ਯੋਜਨਾ ਦੀ ਸ਼ੁਰੂਆਤ ਕੀਤੀ ਹੈ। ‘ਥਾਈਮਾਮਨ ਥੰਗਾ ਮੋਥੀਰਾਮ ਥਿਟਮ’ ਤਹਿਤ ਹੁਣ ਸਰਕਾਰੀ ਹਸਪਤਾਲਾਂ ਵਿੱਚ ਜਨਮ ਲੈਣ ਵਾਲੇ ਹਰ ਬੱਚੇ ਨੂੰ ਇੱਕ ਗ੍ਰਾਮ ਸੋਨੇ ਦੀ ਅੰਗੂਠੀ ਦਿੱਤੀ ਜਾਵੇਗੀ। ਇਸ ਯੋਜਨਾ ਦਾ ਉਦੇਸ਼ ਸਰਕਾਰੀ ਹਸਪਤਾਲਾਂ ਵਿੱਚ ਜਣੇਪੇ ਲਈ ਲੋਕਾਂ ਦਾ ਭਰੋਸਾ ਵਧਾਉਣਾ ਅਤੇ ਆਰਥਿਕ ਤੌਰ ‘ਤੇ ਕਮਜ਼ੋਰ ਪਰਿਵਾਰਾਂ ਨੂੰ ਸਹਾਇਤਾ ਦੇਣਾ ਹੈ। ਸਰਕਾਰ ਵੱਲੋਂ ਹਰ ਬੱਚੇ ਨੂੰ ਜਨਮ ਸਮੇਂ ਸੋਨੇ ਦੀ ਅੰਗੂਠੀ ਭੇਟ ਕੀਤੀ ਜਾਵੇਗੀ। ਮੁੱਖ ਮੰਤਰੀ ਸੀ. ਜੋਸਫ਼ ਵਿਜੇ 15 ਸਤੰਬਰ ਨੂੰ ਇਸ ਯੋਜਨਾ ਦਾ ਅਧਿਕਾਰਤ ਉਦਘਾਟਨ ਕਰਨਗੇ। ਇਹ ਲਾਭ 22 ਜੂਨ 2026 ਤੋਂ ਬਾਅਦ ਜਨਮ ਲੈਣ ਵਾਲੇ ਸਾਰੇ ਬੱਚਿਆਂ ਲਈ ਲਾਗੂ ਹੋਵੇਗਾ। ਇੱਕ ਗ੍ਰਾਮ ਸੋਨੇ ਦੀ ਕੀਮਤ ਲਗਭਗ ₹13,600 ਹੈ ਅਤੇ ਸਰਕਾਰ ਇਸ ਯੋਜਨਾ ‘ਤੇ ਸਾਲਾਨਾ ਕਰੀਬ ₹755.83 ਕਰੋੜ ਖਰਚ ਕਰੇਗੀ।

ਤਾਮਿਲਨਾਡੂ ਦੀ ਪਰੰਪਰਾ ਅਨੁਸਾਰ ਮਾਮਾ (ਥਾਈਮਾਮਨ) ਬੱਚੇ ਨੂੰ ਸੋਨੇ ਦਾ ਤੋਹਫ਼ਾ ਦਿੰਦਾ ਹੈ। ਸਰਕਾਰ ਨੇ ਇਸ ਰਵਾਇਤ ਨੂੰ ਅੱਗੇ ਵਧਾਉਂਦਿਆਂ ਕਿਹਾ ਹੈ ਕਿ ਹੁਣ ਰਾਜ ਖੁਦ ਹਰ ਬੱਚੇ ਲਈ ‘ਮਾਤਾ/ਮਾਮਾ’ ਦੀ ਭੂਮਿਕਾ ਨਿਭਾਏਗਾ ਅਤੇ ਸੋਨੇ ਦੀ ਅੰਗੂਠੀ ਨਾਲ ਸਵਾਗਤ ਕਰੇਗਾ। ਇਹ ਯੋਜਨਾ ਲੜਕਾ-ਲੜਕੀ ਵਿਚ ਕੋਈ ਭੇਦਭਾਵ ਨਹੀਂ ਕਰਦੀ। ਹਰ ਬੱਚੇ ਨੂੰ ਇੱਕੋ ਜਿਹਾ ਲਾਭ ਮਿਲੇਗਾ, ਭਾਵੇਂ ਉਹ ਪਹਿਲਾ ਬੱਚਾ ਹੋਵੇ ਜਾਂ ਬਾਅਦ ਵਾਲਾ। ਸਰਕਾਰ ਦਾ ਮੰਨਣਾ ਹੈ ਕਿ ਇਸ ਕਦਮ ਨਾਲ ਲੋਕਾਂ ਦਾ ਸਰਕਾਰੀ ਹਸਪਤਾਲਾਂ ‘ਤੇ ਭਰੋਸਾ ਵਧੇਗਾ। ਸਰਕਾਰੀ ਹਸਪਤਾਲਾਂ ਵਿੱਚ ਜਣੇਪੇ ਦੀ ਲਾਗਤ ਕਾਫ਼ੀ ਘੱਟ ਹੋਣ ਕਾਰਨ ਇਹ ਯੋਜਨਾ ਗਰੀਬ ਪਰਿਵਾਰਾਂ ਲਈ ਵੱਡੀ ਰਾਹਤ ਮੰਨੀ ਜਾ ਰਹੀ ਹੈ। ਸੋਨੇ ਦੀ ਸੁਰੱਖਿਆ ਲਈ ਹਸਪਤਾਲਾਂ ਵਿੱਚ ਖਾਸ ਲਾਕਰ, ਦੋ ਅਧਿਕਾਰੀਆਂ ਦੀ ਡਬਲ ਕੀ ਸਿਸਟਮ ਅਤੇ 24×7 ਸੀਸੀਟੀਵੀ ਨਿਗਰਾਨੀ ਕੀਤੀ ਜਾਵੇਗੀ। ਬੱਚੇ ਦੀ ਛੁੱਟੀ ਸਮੇਂ ਇਹ ਅੰਗੂਠੀ ਮਾਂ ਨੂੰ ਸਿੱਧੀ ਸੌਂਪੀ ਜਾਵੇਗੀ। ਇਸ ਯੋਜਨਾ ਦਾ ਲਾਭ ਲੈਣ ਲਈ ਮਾਪਿਆਂ ਦਾ ਤਾਮਿਲਨਾਡੂ ਨਿਵਾਸੀ ਹੋਣਾ ਲਾਜ਼ਮੀ ਹੈ ਅਤੇ ਹਸਪਤਾਲ ਵਿੱਚ ਦਾਖਲੇ ਸਮੇਂ ਆਧਾਰ, ਰਾਸ਼ਨ ਕਾਰਡ ਜਾਂ ਵੋਟਰ ਆਈਡੀ ਵਰਗੇ ਦਸਤਾਵੇਜ਼ ਜਮ੍ਹਾਂ ਕਰਵਾਉਣੇ ਹੋਣਗੇ।