ਦਿੱਲੀ ਇਮਾਰਤ ਢਹਿਣ ਦੀ ਸੀਸੀਟੀਵੀ ਫੁਟੇਜ ਆਈ ਸਾਹਮਣੇ, ਦੋਸ਼ੀ ਮਾਲਕ ਅਜੇ ਵੀ ਫਰਾਰ

ਦੱਖਣੀ ਦਿੱਲੀ ਦੇ ਸੱਤਿਆ ਨਿਕੇਤਨ ਖੇਤਰ ਵਿੱਚ ਇੱਕ ਇਮਾਰਤ ਡਿੱਗਣ ਨਾਲ ਪੂਰੀ ਰਾਜਧਾਨੀ ਹਿੱਲ ਗਈ ਹੈ। ਇਹ ਬਹੁ-ਮੰਜ਼ਿਲਾ ਇਮਾਰਤ, ਜਿਸਦੀ ਵਰਤੋਂ ਪੇਇੰਗ ਗੈਸਟ (ਪੀਜੀ) ਰਿਹਾਇਸ਼ ਵਜੋਂ ਕੀਤੀ ਜਾ ਰਹੀ ਸੀ, ਅਚਾਨਕ ਤਾਸ਼ ਦੇ ਘਰ ਵਾਂਗ ਢਹਿ ਗਈ। ਇਸ ਭਿਆਨਕ ਘਟਨਾ ਦੀ ਦਿਲ ਦਹਿਲਾ ਦੇਣ ਵਾਲੀ ਸੀਸੀਟੀਵੀ ਫੁਟੇਜ ਵੀ ਸਾਹਮਣੇ ਆਈ ਹੈ।ਸੀਸੀਟੀਵੀ ਫੁਟੇਜ ਵਿੱਚ ਸਾਫ਼ ਦਿਖਾਈ ਦੇ ਰਿਹਾ ਹੈ ਕਿ ਇੱਕ ਬਜ਼ੁਰਗ ਵਿਅਕਤੀ ਇਮਾਰਤ ਦੇ ਬਿਲਕੁਲ ਹੇਠਾਂ ਆਪਣੇ ਛੋਟੇ ਜਿਹੇ ਸਟਾਲ ‘ਤੇ ਸ਼ਾਂਤੀ ਨਾਲ ਬੈਠਾ ਹੈ। ਅਚਾਨਕ, ਉੱਪਰੋਂ ਮਲਬਾ ਅਤੇ ਧੂੜ ਡਿੱਗਣ ਲੱਗ ਪੈਂਦੀ ਹੈ। ਖ਼ਤਰੇ ਨੂੰ ਮਹਿਸੂਸ ਕਰਦੇ ਹੋਏ, ਬਜ਼ੁਰਗ ਵਿਅਕਤੀ ਆਪਣੀ ਜਾਨ ਬਚਾਉਣ ਲਈ ਤੇਜ਼ੀ ਨਾਲ ਭੱਜਦਾ ਹੈ।ਕੁਝ ਸਕਿੰਟਾਂ ਬਾਅਦ, ਪੂਰੀ ਇਮਾਰਤ ਡਿੱਗ ਪੈਂਦੀ ਹੈ, ਅਤੇ ਧੂੜ ਦੇ ਇੱਕ ਵੱਡੇ ਬੱਦਲ ਨੇ ਖੇਤਰ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ।

ਏਮਜ਼ ਤੋਂ ਅੱਪਡੇਟ

ਏਮਜ਼ ਵੱਲੋਂ ਜਾਰੀ ਬਿਆਨ ਅਨੁਸਾਰ, ਸੱਤਿਆ ਨਿਕੇਤਨ ਇਮਾਰਤ ਢਹਿਣ ਨਾਲ ਮਰਨ ਵਾਲਿਆਂ ਦੀ ਗਿਣਤੀ ਛੇ ਤੱਕ ਪਹੁੰਚ ਗਈ ਹੈ। ਢਹਿਣ ਕਾਰਨ ਜ਼ਖਮੀ ਹੋਏ ਦਸ ਮਰੀਜ਼ਾਂ ਨੂੰ ਜੇਪੀਐਨ ਐਪੈਕਸ ਟਰਾਮਾ ਸੈਂਟਰ (ਏਮਜ਼) ਲਿਆਂਦਾ ਗਿਆ। ਇਨ੍ਹਾਂ ਦਸਾਂ ਵਿੱਚੋਂ ਪੰਜ ਨੂੰ ਪਹੁੰਚਣ ‘ਤੇ ਮ੍ਰਿਤਕ ਐਲਾਨ ਦਿੱਤਾ ਗਿਆ, ਇੱਕ ਗੰਭੀਰ ਜ਼ਖਮੀ ਮਰੀਜ਼ ਬਾਅਦ ਵਿੱਚ ਆਪਣੀਆਂ ਸੱਟਾਂ ਦੀ ਤਾਬ ਨਾ ਝੱਲਦਾ ਹੋਇਆ ਦਮ ਤੋੜ ਗਿਆ, ਅਤੇ ਤਿੰਨ ਨੂੰ ਦਾਖਲ ਕਰਵਾਇਆ ਗਿਆ ਹੈ ਅਤੇ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਹੈ। ਇੱਕ ਮਰੀਜ਼ ਦੇ ਅੰਗਾਂ ਦੀ ਸਰਜਰੀ ਹੋਈ, ਜਦੋਂ ਕਿ ਇੱਕ ਹੋਰ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਅਤੇ ਨਿਗਰਾਨੀ ਤੋਂ ਬਾਅਦ ਉਸਨੂੰ ਛੁੱਟੀ ਦੇ ਦਿੱਤੀ ਗਈ।