ਸੁਖਬੀਰ ਬਾਦਲ ਨੇ ਬਿਜਲੀ ਕੱਟਾਂ ‘ਤੇ ਘੇਰੀ ਪੰਜਾਬ ਸਰਕਾਰ, ਮੰਤਰੀ ਸੌਂਦ ਨੇ ਦਿੱਤਾ ਜਵਾਬ
ਬਲਾਚੌਰ (ਨਵਾਂਸ਼ਹਿਰ): ਪੰਜਾਬ ਵਿੱਚ ਲਗਾਤਾਰ ਹੋ ਰਹੀ ਬਿਜਲੀ ਦੀ ਕਟੌਤੀ ਦਰਮਿਆਨ, ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਭਗਵੰਤ ਮਾਨ ਦੀ ਅਗਵਾਈ ਵਾਲੀ ਆਮ ਆਦਮੀ ਪਾਰਟੀ (AAP) ਸਰਕਾਰ ਦੀ ਲੰਬੇ ਸਮੇਂ ਤੱਕ ਬਿਜਲੀ ਕੱਟਣ ਲਈ ਆਲੋਚਨਾ ਕੀਤੀ, ਜਦਕਿ ਰਾਜ ਦੇ ਕੈਬਨਿਟ ਮੰਤਰੀ ਤਰਨਪ੍ਰੀਤ ਸਿੰਘ ਸੌਂਦ ਨੇ ਕਿਹਾ ਕਿ 3,000 ਮੈਗਾਵਾਟ ਦੀ ਮੰਗ-ਸਪਲਾਈ ਦੀ ਕਮੀ ਅਤੇ ਨਿੱਜੀ ਥਰਮਲ ਪਲਾਂਟਾਂ ਵਿੱਚ ਤਕਨੀਕੀ ਖਰਾਬੀ ਕਾਰਨ ਮੌਜੂਦਾ ਸਥਿਤੀ ਪੈਦਾ ਹੋਈ ਹੈ।
‘ਦਿਨ ਵਿੱਚ 10 ਘੰਟੇ ਤੱਕ ਕੱਟ’
ਬਲਾਚੌਰ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਅਕਾਲੀ ਦਲ ਦੇ ਮੁਖੀ ਨੇ ਦੋਸ਼ ਲਾਇਆ ਕਿ ਲੋਕਾਂ ਨੂੰ 10 ਘੰਟੇ ਤੱਕ ਦੇ ਬਿਜਲੀ ਕੱਟਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਉਨ੍ਹਾਂ ਨੇ ਮੌਜੂਦਾ ਹਾਲਾਤ ਦੀ ਤੁਲਨਾ ਪਿਛਲੀਆਂ ਅਕਾਲੀ ਦਲ ਸਰਕਾਰਾਂ ਦੌਰਾਨ ਬਿਜਲੀ ਸਪਲਾਈ ਨਾਲ ਕੀਤੀ। ਸੁਖਬੀਰ ਬਾਦਲ ਨੇ ਕਿਹਾ, “ਭਗਵੰਤ ਮਾਨ ਕਿਹਾ ਕਰਦੇ ਸਨ ਕਿ ਅਸੀਂ ਦਿਨ ਵਿੱਚ 12 ਘੰਟੇ ਬਿਜਲੀ ਦਿੰਦੇ ਹਾਂ। ਉਹ ਬਿਜਲੀ ਕਿੱਥੇ ਹੈ? ਜਿੱਥੇ ਬਾਦਲ ਸਾਬ੍ਹ 24 ਘੰਟੇ ਬਿਜਲੀ ਦਿੰਦੇ ਸਨ, ਉੱਥੇ ਹੁਣ ਦਿਨ ਵਿੱਚ 10 ਘੰਟੇ ਤੱਕ ਕੱਟ ਲੱਗ ਰਹੇ ਹਨ। ਉਹ ਨਾਕਾਮ ਲੋਕ ਹਨ।”
‘ਪੰਜਾਬ ਨੂੰ ਪੂਰੀ ਤਰ੍ਹਾਂ ਬਰਬਾਦ ਕਰ ਦਿੱਤਾ’
ਅਕਾਲੀ ਦਲ ਦੇ ਕਾਰਜਕਾਲ ਦੌਰਾਨ ਸ਼ੁਰੂ ਕੀਤੇ ਗਏ ਥਰਮਲ ਪਾਵਰ ਪ੍ਰੋਜੈਕਟਾਂ ਦਾ ਜ਼ਿਕਰ ਕਰਦਿਆਂ ਸੁਖਬੀਰ ਬਾਦਲ ਨੇ ਕਿਹਾ ਕਿ, ‘ਪਾਰਟੀ ਸੂਬੇ ਨੂੰ ਦੁਬਾਰਾ ਬਿਜਲੀ ਦੇ ਮਾਮਲੇ ਵਿੱਚ ਵਾਧੂ ਸਮਰੱਥਾ ਵਾਲਾ (surplus) ਬਣਾਉਣ ਲਈ ਕੰਮ ਕਰੇਗੀ। ਜੇਕਰ ਅਕਾਲੀ ਦਲ ਸੱਤਾ ਵਿੱਚ ਨਾ ਹੁੰਦਾ ਤਾਂ ਅਸੀਂ ਇੰਨੇ ਥਰਮਲ ਪਲਾਂਟ ਨਾ ਬਣਾਏ ਹੁੰਦੇ ਅਤੇ ਅੱਜ ਪੰਜਾਬ ਵਿੱਚ ਬਿਜਲੀ ਨਾ ਹੁੰਦੀ। ਮੈਂ ਹੁਣ ਵੀ ਵਾਅਦਾ ਕਰਦਾ ਹਾਂ ਕਿ ਮੈਂ ਬਿਜਲੀ ਦੀ ਵਾਧੂ ਉਪਲਬਧਤਾ ਦੁਬਾਰਾ ਕਾਇਮ ਕਰਾਂਗਾ। ਅਸੀਂ ਹੁਣ ਤੋਂ ਇਨ੍ਹਾਂ ਕਮੀਆਂ ਨੂੰ ਪੂਰਾ ਕਰਾਂਗੇ ਕਿਉਂਕਿ ਪਿਛਲੇ ਦਸ ਸਾਲਾਂ ਵਿੱਚ ਕਾਂਗਰਸ ਅਤੇ ‘ਆਪ’ ਨੇ ਪੰਜਾਬ ਨੂੰ ਪੂਰੀ ਤਰ੍ਹਾਂ ਬਰਬਾਦ ਕਰ ਦਿੱਤਾ ਹੈ।”
