ਸੋਨੇ ਦੀਆਂ ਕੀਮਤਾਂ ਨੂੰ ਲੈ ਕੇ ਵੱਡੀ ਚਿੰਤਾ

ਨਵੀ ਦਿੱਲੀ: ਭਾਰਤ ਵਿੱਚ ਸੋਨਾ ਖਰੀਦਣ ਵਾਲਿਆਂ ਲਈ ਚਿੰਤਾ ਵਧਾਉਣ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ICICI ਬੈਂਕ ਦੀ ਤਾਜ਼ਾ ਗਲੋਬਲ ਮਾਰਕੀਟਸ ਰਿਪੋਰਟ ਅਨੁਸਾਰ ਆਉਣ ਵਾਲੇ ਸਾਲਾਂ ਵਿੱਚ ਸੋਨੇ ਦੀਆਂ ਕੀਮਤਾਂ ਵਿੱਚ ਵੱਡਾ ਉਛਾਲ ਦੇਖਣ ਨੂੰ ਮਿਲ ਸਕਦਾ ਹੈ। ਰਿਪੋਰਟ ਮੁਤਾਬਕ 2026 ਦੇ ਬਾਕੀ ਮਹੀਨਿਆਂ ਦੌਰਾਨ ਘਰੇਲੂ ਸੋਨੇ ਦੀ ਕੀਮਤ 1,50,000 ਤੋਂ 1,80,000 ਰੁਪਏ ਪ੍ਰਤੀ 10 ਗ੍ਰਾਮ ਦੇ ਵਿਚਕਾਰ ਰਹਿ ਸਕਦੀ ਹੈ।
ਇਸ ਤੋਂ ਅੱਗੇ 2027 ਤੱਕ ਕੀਮਤਾਂ 1,60,000 ਤੋਂ 1,90,000 ਰੁਪਏ ਪ੍ਰਤੀ 10 ਗ੍ਰਾਮ ਤੱਕ ਵੀ ਪਹੁੰਚ ਸਕਦੀਆਂ ਹਨ।

ਕੀਮਤਾਂ ਵਧਣ ਦੇ ਮੁੱਖ ਕਾਰਨ

ਰਿਪੋਰਟ ਵਿੱਚ ਸੋਨੇ ਦੀਆਂ ਕੀਮਤਾਂ ਵਧਣ ਦੇ ਕਈ ਵੱਡੇ ਕਾਰਨ ਦਰਸਾਏ ਗਏ ਹਨ—

• ਭਾਰਤੀ ਰੁਪਏ ਦੀ ਲਗਾਤਾਰ ਗਿਰਾਵਟ (ਲਗਭਗ 96 ਰੁਪਏ ਪ੍ਰਤੀ ਡਾਲਰ ਤੱਕ)
• ਇਸ ਸਾਲ ਰੁਪਏ ਵਿੱਚ ਕਰੀਬ 7% ਦੀ ਕਮੀ
• ਕਸਟਮ ਡਿਊਟੀ ਵਿੱਚ ਵਾਧਾ (6% ਤੋਂ 15%)
• ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਸੋਨੇ ਦੀਆਂ ਕੀਮਤਾਂ ਵਿੱਚ ਵਾਧਾ
• ਪੱਛਮੀ ਏਸ਼ੀਆ ਦੇ ਭੂ-ਰਾਜਨੀਤਿਕ ਤਣਾਅ

ਮੰਗ ਵਿੱਚ ਵੱਡੀ ਗਿਰਾਵਟ

ਰਿਪੋਰਟ ਅਨੁਸਾਰ 2026 ਦੀ ਪਹਿਲੀ ਤਿਮਾਹੀ ਵਿੱਚ ਗਹਿਣਿਆਂ ਦੀ ਮੰਗ ਵਿੱਚ 23% ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਇਸ ਦੇ ਨਾਲ ਹੀ ਸੋਨੇ ਦਾ ਆਯਾਤ ਵੀ ਘਟ ਕੇ 30 ਟਨ ਪ੍ਰਤੀ ਮਹੀਨਾ ਰਹਿ ਗਿਆ ਹੈ, ਜਦਕਿ ਪਹਿਲਾਂ ਇਹ ਕਰੀਬ 50 ਟਨ ਸੀ।Gold ETF ਵਿੱਚ ਨਿਵੇਸ਼ਕਾਂ ਦੀ ਦਿਲਚਸਪੀ ਵੀ ਕਾਫੀ ਘਟ ਗਈ ਹੈ, ਜਿਸ ਨਾਲ ਬਾਜ਼ਾਰ ‘ਤੇ ਅਸਰ ਪੈ ਰਿਹਾ ਹੈ। ਰਿਪੋਰਟ ਵਿੱਚ ਚੇਤਾਵਨੀ ਦਿੱਤੀ ਗਈ ਹੈ ਕਿ ਜੇਕਰ ਗਲੋਬਲ ਬਾਜ਼ਾਰ ਵਿੱਚ ਸੋਨੇ ਦੀ ਕੀਮਤ ਉਮੀਦ ਮੁਤਾਬਕ ਨਹੀਂ ਵਧਦੀ ਜਾਂ ਅਮਰੀਕੀ ਫੈਡਰਲ ਰਿਜ਼ਰਵ ਆਪਣੀਆਂ ਨੀਤੀਆਂ ਸਖ਼ਤ ਕਰਦਾ ਹੈ, ਤਾਂ ਕੀਮਤਾਂ ਦੀ ਇਹ ਤੇਜ਼ੀ ਕੁਝ ਹੱਦ ਤੱਕ ਰੁਕ ਵੀ ਸਕਦੀ ਹੈ।