ISRO ਦੀ ਵੱਡੀ ਖੋਜ: ਚੰਦਰਮਾ ਦੇ ਸਭ ਤੋਂ ਠੰਡੇ ਖੇਤਰਾਂ ‘ਚ ਬਰਫ਼ ਦੇ ਮਜ਼ਬੂਤ ਸਬੂਤ, ਭਵਿੱਖੀ ਮਿਸ਼ਨਾਂ ਲਈ ਵੱਡੀ ਉਮੀਦ

ਭਾਰਤੀ ਅੰਤਰਿਕਸ਼ ਖੋਜ ਸੰਸਥਾ (ISRO) ਨਾਲ ਜੁੜੇ ਇਕ ਨਵੇਂ ਅਧਿਐਨ ਵਿੱਚ ਚੰਦਰਮਾ ਦੇ ਦੱਖਣੀ ਧਰੁਵੀ ਖੇਤਰ ਵਿੱਚ ਸਥਿਤ ਕੁਝ ਸਭ ਤੋਂ ਠੰਡੇ ਕ੍ਰੇਟਰਾਂ ਹੇਠਾਂ ਪਾਣੀ ਦੀ ਬਰਫ਼ ਦੇ ਮਜ਼ਬੂਤ ਸਬੂਤ ਮਿਲੇ ਹਨ। ਇਹ ਖੋਜ ਚੰਦਰਮਾ ਦੇ ਉਹਨਾਂ ਹਿੱਸਿਆਂ ‘ਤੇ ਕੇਂਦਰਿਤ ਹੈ ਜੋ ਸਦਾ ਪਰਛਾਵੇਂ ਵਿੱਚ ਰਹਿੰਦੇ ਹਨ।

ISRO ਵੱਲੋਂ ਜਾਰੀ ਜਾਣਕਾਰੀ ਅਨੁਸਾਰ ਇਹ ਨਤੀਜੇ ਭਵਿੱਖ ਦੇ ਚੰਦਰ ਮਿਸ਼ਨਾਂ ਲਈ ਕਾਫ਼ੀ ਮਹੱਤਵਪੂਰਨ ਮੰਨੇ ਜਾ ਰਹੇ ਹਨ। ਇਸ ਨਾਲ ਨਾ ਸਿਰਫ਼ ਉਤਰਨ ਲਈ ਸੰਭਾਵੀ ਥਾਵਾਂ ਦੀ ਪਛਾਣ ਆਸਾਨ ਹੋਵੇਗੀ, ਸਗੋਂ ਚੰਦਰਮਾ ‘ਤੇ ਮੌਜੂਦ ਸਰੋਤਾਂ ਦੀ ਵਰਤੋਂ ਕਰਕੇ ਮਨੁੱਖੀ ਮਿਸ਼ਨਾਂ ਦੀ ਯੋਜਨਾ ਵੀ ਸੌਖੀ ਹੋ ਸਕਦੀ ਹੈ। ਇਹ ਅਧਿਐਨ ਅਹਿਮਦਾਬਾਦ ਸਥਿਤ ਫਿਜ਼ੀਕਲ ਰਿਸਰਚ ਲੈਬੋਰੇਟਰੀ ਦੇ ਵਿਗਿਆਨੀਆਂ ਵੱਲੋਂ ਕੀਤਾ ਗਿਆ ਹੈ। ਵਿਗਿਆਨੀਆਂ ਨੇ ਚੰਦਰਯਾਨ-2 ਆਰਬਿਟਰ ਦੇ ਡਿਊਲ ਫ੍ਰੀਕੁਐਂਸੀ ਸਿੰਥੈਟਿਕ ਅਪਰਚਰ ਰਾਡਾਰ ਤੋਂ ਮਿਲੇ ਡੇਟਾ ਦਾ ਵਿਸ਼ਲੇਸ਼ਣ ਕੀਤਾ, ਜੋ ਧਰਤੀ ਦੀ ਸਤ੍ਹਾ ਦੀਆਂ ਬਹੁਤ ਵਿਸਥਾਰਤ ਤਸਵੀਰਾਂ ਕੈਪਚਰ ਕਰਨ ਲਈ ਵਰਤਿਆ ਜਾਂਦਾ ਹੈ। ਖੋਜਕਰਤਾਵਾਂ ਮੁਤਾਬਕ ਚੰਦਰਮਾ ਦੇ ਇਹ ਖੇਤਰ ਸੂਰਜ ਦੀ ਰੋਸ਼ਨੀ ਅਤੇ ਗਰਮੀ ਤੋਂ ਲਗਭਗ ਪੂਰੀ ਤਰ੍ਹਾਂ ਬਚੇ ਰਹਿੰਦੇ ਹਨ, ਜਿਸ ਕਾਰਨ ਇਹ ਥਾਵਾਂ ਲੰਬੇ ਸਮੇਂ ਤੱਕ ਪਾਣੀ ਦੀ ਬਰਫ਼ ਨੂੰ ਸੁਰੱਖਿਅਤ ਰੱਖਣ ਲਈ ਬਹੁਤ ਅਨੁਕੂਲ ਮੰਨੀਆਂ ਜਾਂਦੀਆਂ ਹਨ। ਇਹ ਖੋਜ ਭਵਿੱਖ ਵਿੱਚ ਮਨੁੱਖੀ ਪੁਲਾੜ ਮਿਸ਼ਨਾਂ ਅਤੇ ਚੰਦਰਮਾ ‘ਤੇ ਸੰਭਾਵੀ ਬਸਤੀਕਰਨ ਲਈ ਇਕ ਮਹੱਤਵਪੂਰਨ ਕਦਮ ਮੰਨੀ ਜਾ ਰਹੀ ਹੈ।